Wednesday, September 12, 2018

മുക്തി, ശാന്തി

ദൈവം ഉണ്ടോ ഇല്ലയോ എന്നൊക്കെ നമ്മൾ ഇടയ്ക്കിടെ സ്വയം ചോദിക്കാറുണ്ട്. എന്നാൽ എന്റെ ജീവിതത്തിലെ പ്രധാനപ്പെട്ട വഴിത്തിരിവുകളിലൊക്കെ ദൈവമാണ് എന്നെ നയിക്കുന്നത് എന്ന് എനിക്ക് അനുഭവപ്പെട്ടിട്ടുണ്ട്.

തോറ്റുതളർന്ന് എല്ലാ ആശയുമറ്റ് ചെളിക്കുണ്ടിൽ കിടക്കുമ്പോൾ ഒരദൃശ്യ കരം വന്ന് ഒറ്റ രാത്രി വെളുക്കുമ്പോൾ നമ്മെ പല്ലക്കിലേറ്റി വിജയിയായി പ്രഖ്യാപിക്കുന്നപോലെ ഉള്ള തികച്ചും അപ്രതീക്ഷിതമായ ചില പ്രതിഭാസങ്ങൾ ജീവിതത്തിൽ ഒരുപാട് തവണ സംഭവിച്ചിട്ടുണ്ട്.

നഷ്ടങ്ങൾ ഇല്ല എന്നല്ല, ആ നഷ്ടങ്ങളെ ഒക്കെ നികത്തും വിധം ഉള്ള അനുഗ്രഹങ്ങളും ഉണ്ടായിട്ടുണ്ട്.

തോറ്റുകൊടുക്കൽ, വിട്ടുകൊടുക്കൽ, വഴിമാറിക്കൊടുക്കൽ
തുടങ്ങി പല കീഴടങ്ങളുകളിലൂടെ ഞാൻ സായത്തമാക്കാൻ തുനിഞ്ഞത് സ്നേഹവും സമാധാനവും മാത്രമായിരുന്നു. എനിക്ക് മാത്രമല്ല എന്നെപ്പോലെ മറ്റ് മനുഷ്യജീവികൾക്കും വേണ്ടി.

നമ്മുടെ കഷ്ടങ്ങളുടെ ഉത്തരവാദിത്വം മറ്റുള്ളവരിലേറ്റാനോ, അല്ലെങ്കിൽ അവരുടെ വിജയത്തിനെ കരിവാരിതേയ്ക്കാനോ പോയിട്ടില്ല. എന്റെ കഷ്ടപ്പാടുകളുടെ ഉത്തരവാദി ഞാൻ തന്നെയാണ്. അജ്ഞതമൂലം ഞാൻ തിരഞ്ഞെടുത്ത തെറ്റായ ചില വഴികൾ എന്നെ കൊണ്ടുചെന്നെത്തിച്ചത് പല ദുർഘടങ്ങളിലും ആയിരുന്നു. പക്ഷെ ആ അപകടസന്ധിയിലൊക്കെ എനിക്ക് തുണയായുണ്ടായിരുന്ന ശക്തി ആ ദൈവത്തിന്റേതാണ്.

എനിക്ക് സ്നേഹവും സംരക്ഷണവും എല്ലാം തന്നത് അദ്ദേഹം തന്നെയാണ്. ശൂന്യതയിലൂടെ ഞാൻ അദ്ദേഹത്തിന്റെ സ്നേഹം ആവാഹിക്കയായിരുന്നു. അദൃശ്യനായ അദ്ദേഹത്തിന്റെ..

ഇത്രയും എഴുതിയത് മനസ്സിൽ നന്ദി വന്നുനിറഞ്ഞപ്പോഴാണ്. 

ആഗ്രഹങ്ങൾ അടക്കി അടങ്ങിയൊതുങ്ങി ജീവിക്കുമ്പോൾ ചില സംഭവങ്ങൾ അവസരങ്ങൾ നമ്മെ തേടിയെത്തുമ്പോഴുണ്ടാവുന്ന ധന്യത.

അത്തരത്തിൽ ഒന്നാണ് ഇന്ന് കേരളത്തിലെ വെള്ളപ്പൊക്കദുരിതാശ്വാസത്തിനായുള്ള പണം ശേഖരിക്കാനായി വേണ്ടപ്പെട്ടവരോടൊപ്പം, നല്ല മനസ്സുള്ളവരോടൊപ്പം ചില സമയങ്ങൾ ചിലവാക്കാനായതും പ്രയോജനകരമായി വല്ലതും ചെയ്യാനായതും. നാം നമുക്കുവേണ്ടിയല്ലാതെ മറ്റുള്ളവർക്കായി നമ്മുടെ സമയത്തെ ചിലവാക്കി അത് ഫലമുണ്ടായി കാണുമ്പോഴുണ്ടാവുന്ന ആത്മനിർവൃതി.

അതിൽ കൂടുതൽ സന്തോഷിക്കണ്ട. ചെയ്തുകഴിഞ്ഞ സംതൃപ്തിയോടെ മനസ്സിനെ മറ്റ് വല്ലതിലേയ്ക്കും തിരിക്കാം. 

സന്തോഷമായാലും സങ്കടമായാലും അതിനെ തുല്യതയോടെ സ്വീകരിക്കണമെന്നല്ലെ പറയാറ്. ആസക്തിയോടെ അത് സ്വീകരിച്ചാൽ അതിൽ നിന്നുണ്ടാവുന്ന ദുഃഖത്തിൽ നമ്മൾ തളർന്നേക്കും. 

സത്‌സംഗത്ത്വേ നിസ്സംഗത്വം 
നിസ്സംഗത്ത്വേ നിർമോഹത്വം
നിർമോഹത്വേ മോഹത്‌മുക്തി

എന്നല്ലെ ഭജഗോവിന്ദത്തിൽ പറയുന്നത്. നമുക്ക് നിസ്സംഗതയോടെ സത്‌പ്രവർത്തികൾ ചെയ്യാൻ ശ്രമിക്കാം. അങ്ങിനെ മുക്തി, ശാന്തി ഒക്കെ കിട്ടട്ടെ

No comments: