Wednesday, June 30, 2010

ഒരു ബാറ്റും കുറെ കുഞ്ഞു കൊതുകുകളും!!

കുറച്ചു ദിവസങ്ങള്‍ സത്യവതിയോടും സുവര്‍ണ്ണലതയോടും ബകുളിനോടും കൂടെയായിരുന്നു..(ആശപൂര്‍ണ്ണാദേവിയുടെ നായികമാരോടൊപ്പം). വായിച്ചു തീര്‍ന്നപ്പോള്‍ ഒരു ശൂന്യതാബാധം! അതു നികത്താനായി ഒരു ദേശത്തിന്റെ കഥ വായിച്ചു തുടങ്ങി.. അതിരാണിപ്പാടത്ത് എത്തി നില്‍ക്കുന്നു.. ഇനി കുറച്ചു ദിവസങ്ങള്‍ അവരൊടെപ്പം ജീവിക്കാം...!

എഴുതാന്‍ സമ്മതിക്കാതെ ഒരു കൊതുക് ചുറ്റിനും വലം വയ്ക്കുന്നു.. എങ്കിപ്പിന്നെ അതിനെപ്പറ്റിയാകാം ഇന്നത്തെ കഥ!

ഒന്നു രണ്ട് വരി എഴുതുമ്പോഴേക്കും പതുങ്ങി വന്ന് കാലില്‍ ഒരു കടി, എന്നിട്ട് ഒറ്റ പറക്കല്‍. എന്റെ ‘ബാറ്റുമായി’ ഞാന്‍ കാത്തിരിക്കുന്നു!. കൊതുകിനെ പിടിക്കാന്‍ ഒരു ബാറ്റുണ്ട്, കഴിഞ്ഞ പ്രാവശ്യം നാട്ടില്‍ ചെന്നപ്പോള്‍ അതായിരുന്നു ഒരു വലിയ സന്തോഷം/ അല്‍ഭുതം!

നാട്ടിലെത്തി ആദ്യരാത്രി ഞാനും മകളും കൂടി ഞങ്ങളുടെ മുറിയിലും അച്ഛനും അമ്മയും അവരുടെ മുറിയിലും കയറി അല്പം കഴിഞ്ഞപ്പോള്‍ അമ്മയുടെ മുറിയില്‍ നിന്നും പട്ടാസു പൊട്ടുന്നപോലെ പട പടാ ശബ്ദം! അമ്മയിനി കൊച്ചു മക്കളെയൊക്കെ കണ്ട സന്തോഷത്തില്‍ മതിമറന്ന് പട്ടാസ് പൊട്ടിക്കുകയാണോ?!വട്ടായോ?! ഓടിച്ചെന്നു നോക്കിയപ്പോള്‍ അമ്മ ഒരു ബാറ്റുമായി കട്ടിലില്‍ എഴുന്നേറ്റിരുന്ന് കളിയോട് കളി! ഇതെന്തു മറിമായം! ഇങ്ങനേ ഒരു കളിയുണ്ടോ?! ഇനി കേരളം വികസിച്ചു വികസിച്ചു വയോജനങ്ങളുടെ ബോറഡി മാറാനോ, മാനസിക ഉല്ലാസത്തിനോ വേണ്ടി കണ്ടുപിടിച്ചതായിരിക്കുമോ ഈ കളി! ഇപ്പോള്‍ എല്ലാം ഇമാജിനേഷന്‍ അല്ലെ, കൂടെ കളിക്കാന്‍ ആരുമില്ല. അച്ഛന്‍ സ്വസ്ഥമായി കിടക്കുന്നു..

“അമ്മേ എന്തുപറ്റി?! ബാറ്റു കളിക്കുന്നോ?” ( പക്ഷെ അമ്മ ശരിക്കും ബാഡ്മിന്റന്‍ ഒക്കെ കളിക്കും ട്ടൊ! അതു വേറൊരു കഥ)

“അല്ല, നശിച്ച കൊതുകാരണം ഉറങ്ങാന്‍ പറ്റുന്നില്ല. അതിനിടയില്‍ അമ്മ ബാറ്റ് വീണ്ടും ശൂന്യതയില്‍ വീശി. അപ്പോള്‍ പട പടാ ശബ്ദം വീണ്ടും കേട്ടു!

ഞാനും മോളും അല്‍ഭുതത്തോടെ ‘മലയാളീസിന്റെ ആ കണ്ടുപിടിത്തം’ നോക്കി വണ്ടറടിച്ചു നില്‍ക്കുമ്പോള്‍, ‘ഇന്നാ വേണമെങ്കില്‍ ഇതെടുത്തോ എനിക്ക് ഇനി ഒന്നുകൂടിയുണ്ട്’ എന്നും പറഞ്ഞ് വച്ച് നീട്ടി!

കേള്‍ക്കാത്ത താമസം ഞാന്‍ ഓടി ചെന്ന് ഭക്തിപുരസ്സരം ബാറ്റ് വാങ്ങി. എന്റെ കയ്യില്‍ നിന്നും അധികം ഭക്തിയൊന്നും ഇല്ലാതെ തന്നെ അത് മകള്‍ കയ്ക്കലാക്കി..അവള്‍ ഓടി മുറിക്കകത്തു കയറി കട്ടിലിനു ചുറ്റിനും തലങ്ങും വിലങ്ങും വീശിയപ്പോള്‍ കേട്ട പട പടാ ശബ്ദത്തില്‍ അവള്‍ അവളുടെ നാടു വിട്ട അങ്കലാപ്പൊക്കെ മാറി സുസ്മേരവദനയായി. ഞാന്‍ ആശ്വസിച്ചു.. ഇത്തവണത്തെ വരവ് വെറും ബോറായിരിക്കില്ല. അറ്റ് ലീസ്റ്റ് മകളെങ്കിലും എന്‍‌ജോയ് ചെയ്തോളും . ഞങ്ങള്‍ പോകുന്നതുവരെ കൊല്ലാന്‍ ഇഷ്ടം പോലെ കൊതുക്കള്‍ വന്നോളും. കൊതുകിനാണോ ദാരിദ്യം!

തിരിച്ചു വരുമ്പോള്‍ ഞങ്ങളുടെ ബോറഡി മാറ്റിയ ആ അല്‍ഭുത വസ്തുവിനെ ഭദ്രമായി പൊതിഞ്ഞു കെട്ടി ഇവിടെ എത്തിച്ചു. ഇവിടെ ഒരു പ്രശ്നം എന്തെന്നാല്‍ കൊതു ചില ദിവസങ്ങളിലേ ഉണ്ടാവൂ.. അതെന്നാണെന്ന് കൃത്യമായി ഇനിയും കണ്ടുപിടിച്ചിട്ടില്ലാ താനും! അങ്ങിനെ ഞങ്ങള്‍ ആയുധം വച്ച് കാത്തിരുന്നു.. കേരളത്തിലെ അല്‍ഭുതം ഇവിടെയും പ്രാവര്‍ത്തികമാക്കാന്‍..

ഒടുവില്‍ ആ സുദിനം വന്നെത്തി. ഒരു ഞായറാഴ്ച്ച സന്ധ്യക്ക് കൊതുകള്‍ ഒന്നൊന്നായി വരവായി.. കൊതുകുവരാതായപ്പോള്‍ ആയുധത്തിന്റെ കാര്യം മറന്നുപോയ മകള്‍ പെട്ടെന്ന് ഓര്‍ത്തു..
‘അമ്മേ നമ്മള്‍ ഇന്ത്യയില്‍ നിന്നും കൊണ്ടു വന്ന ബാറ്റ്..?’
‘ഏതു ബാറ്റ്?’
‘കൊതുകിനെ പിടിക്കുന്ന ബാറ്റ്!’
ഇതു കേട്ട് അവളുടെ അച്ഛന്‍ മിഴിച്ചു നോക്കി. അതുകണ്ടപ്പോള്‍ എനിക്കും ഉത്സാഹമായി!
സകലകലാവല്ലഭനെ കാട്ടാന്‍ ഒരു അല്‍ഭുതം ഞങ്ങള്‍ക്കും ഉണ്ടല്ലൊ എന്ന ഒരു ത്രില്ലില്‍ ഓടിപ്പോയി ബാറ്റെടുത്ത് മകളെ ഏല്പിച്ചു. അവള്‍ ചുറ്റിനും കൂടിയ കൊതുകുകളെ അങ്ങിനെ ടപ്, ടപ് എന്നും പറഞ്ഞ് പൊട്ടിച്ചു രസിക്കാന്‍ തുടങ്ങിയപ്പോള്‍, സകലകലാ വല്ലഭന്‍ ചോദിച്ചു,
‘അതു കൊള്ളാമല്ലൊ! അത് കൊതുവായിരിക്കില്ല!!’ ( ഇതൊക്കെ ഒരു നമ്പര്‍ ആണ്, ആദ്യം ഇന്നസന്റ് ആയി അഭിനയിക്കും നമ്മുടെ പ്രത്യേകത എന്തെന്നു മനസ്സിലാക്കി അത് സ്വന്തം നിയന്ത്രണത്തിലാകും വരെ തുടരും ഈ ഇന്നസന്‍സ്)
‘അത് കൊതുക് തന്നെയാണ് ’ മകള്‍ പറഞ്ഞു
ഞാനും ഏറ്റു പറഞ്ഞു, ‘അതെ കൊതുകാണ്.’
‘അല്ല! എങ്കില്‍ ഞാന്‍ നോക്കട്ടെ?’
ഞങ്ങള്‍ അപ്പ്രൂവലിനുവേണ്ടി ബാറ്റ് കയ്യില്‍ കൊടുത്തു.. പിന്നെ ഒരു മേളമായിരുന്നു..!! യജമാനന്‍ ആ ബാറ്റും കൊണ്ട് സാക്ഷാല്‍ യുദ്ധം ആരംഭിച്ചു. വീടുമുഴുവന്‍ ഓടിനടന്ന് അടിയോടടി.. ആകപ്പാടെ ഒരു പടപടാ ശബ്ദം ..അകത്തും മുഴുവന്‍ തീര്‍ത്തശേഷം പോരാഞ്ഞ് വെളിയിലിറങ്ങി അടിതുടങ്ങി

ചായയിടാന്‍ പോയ ഞാനും, ഇതിനകം കളി അച്ഛനു കൈമാറിയ ശൂന്യതയില്‍ മകള്‍ ഹോംവര്‍ക്കും ചെയ്തു തുടങ്ങിയിരുന്നു. വെളിയില്‍ പടാ പടാ എന്നൊക്കെ കേള്‍ക്കുന്നു. അദ്ദേഹം ഉള്ള ചെടികളും മരങ്ങളും ഒക്കെ ഇളക്കി അങ്ങിനെ ആര്‍മാദിച്ച് തകര്‍ക്കുകയാണ്. ഒടുവില്‍ ക്ഷീണിച്ച് അവശനായി ബാറ്റുമായി തിരിച്ചെത്തി.
‘ഈ രാജ്യത്തെ കൊതുകിനെ മുഴുവന്‍ നശിപ്പിച്ചൊ?!!’ - ഞാന്‍
‘ബാറ്റെവിടെ?’ എന്റെ ഉള്ളൊന്ന് ആളി! ദൈവമേ അത് നശിപ്പിച്ചോ!
‘ഓ! ഇതിനെന്തോ കുഴപ്പമുണ്ട്’ -അദ്ദേഹം
‘അതുപിന്നെ ഇത്രേം പാടുണ്ടോ?! അതു പാഴിക്കളഞ്ഞു !!’(ഞാന്‍ പരിതപിച്ചു)
‘ഞാനൊന്നും ചെയ്തില്ല.’ (നിസ്സഹായത!)

അങ്ങിനെ അതോടെ ബാറ്റ് കളി അവസാനിച്ചു.

പിന്നെ ആരെങ്കിലും നാട്ടില്‍ നിന്നു വരാന്‍ കാത്തിരുന്നു. ഒടുവില്‍ ഒരു ബന്ധു ബാറ്റു കൊണ്ടു തന്നപ്പോള്‍ ഗൃഹനാഥനെ നോക്കി പറഞ്ഞു.., ‘പാടില്ല പാടില്ല നമ്മെ നമ്മെ , പാടെ മറന്നൊന്നും ചെയ്തു കൂടാ..’
യജമാനന്റെ മുഖത്ത്, എന്തുകൊണ്ടോ, ഒരല്പം ജാള്യത മിന്നി മറയുന്നത് കണ്ടപ്പോള്‍ ആശ്വാ‍സമായി
അപ്പോള്‍ ഈ ബാറ്റ് രക്ഷപ്പെട്ടൂ..

അങ്ങിനെ ഒടുവില്‍ കിട്ടിയ രണ്ടു ബാറ്റുകളുമായാണ് ബ്ളോഗെഴുത്തും വായനയും ഒക്കെ. ബാറ്റ് വീശാന്‍ ഒരല്പം മറന്നാല്‍ കൊതുക് ഏതെങ്കിലും വശത്തൂടെ വന്ന് കടിക്കും! ‘കൊതുവേ നീയും നാട്ടിലെ ഐറ്റിയും ഐ ഐ റ്റിയും ഒക്കെയാണോ?! എന്തൊരപാര ബുദ്ധി!! സമ്മതിച്ചു തരാതെ നിര്‍വ്വാഹമില്ലാ..’

അങ്ങിനെ ഞാന്‍ ബാറ്റുമായി കാത്തിരിക്കുന്നു.. കൊതുകു പാത്തും പതുങ്ങിയും കടിച്ചേച്ച് കൂളായി അങ്ങ് പറന്നുയരുന്നു..

ഈ കൊതുകുബാറ്റിന്റെ കാര്യം എഴുതിയപ്പോള്‍ ആത്മയ്ക്ക് പണ്ട് നടന്ന മറ്റൊരു സംഭവം ഓര്‍മ്മ വരുന്നു..ഒരു ഈരുകൊല്ലിയുടെ കഥ!( ഈര് എന്നു പറയുന്നത് പേനിന്റെ മുട്ടയാണ് ട്ടൊ)അത് അടുത്ത പോസ്റ്റില്‍...

25 comments:

കുഞ്ഞൂസ് (Kunjuss) said...

ആത്മാ,രസികന്‍ പോസ്റ്റ്‌...ഈ ആത്മ എങ്ങിനെ എന്റെ ഉള്ളില്‍ കേറിപ്പറ്റി ഓരോന്ന് തപ്പിയെടുക്കുന്നു എന്നതിശയിച്ചു പോകുന്നു! ഓരോന്നും വള്ളിപുള്ളി വിടാതെ പറയുന്ന പോലെയാ എനിക്ക് തോന്നുന്നേ...

ആത്മ said...

രാവിലെ തന്നെ കുഞ്ഞൂസിനെയും കുഞ്ഞൂസിന്റെ കമന്റും കണ്ടതില്‍ വളരെ വളരെ സന്തോഷം!

സു | Su said...

ഈരുകൊല്ലി മിടുക്കൻ തന്നെ. വായിച്ചു ചിരിവന്നു. കൊതുകിനെ വെറുതേ വിടൂ. ഇരിക്കുന്നിടത്ത് ചന്ദനത്തിരി കത്തിച്ചുവച്ചാൽ മതി. ബാറ്റുകൊണ്ട് കൊല്ലുന്നതൊക്കെ കൊള്ളാം. കൈവേദനിക്കും. മഴ തുടങ്ങി, കൊതുകും വന്നു. :(

ആശാപൂർണ്ണാദേവിയുടെ കഥകളൊക്കെ വായിച്ചു അല്ലേ? എഴുത്തും വായനയും ഒക്കെ നടക്കട്ടെ.

തിരക്കിലാണ് ആത്മേച്ചീ. എന്നാലും വന്നുനോക്കാറുണ്ട്ട്ടോ. :)

Rare Rose said...

കുഞ്ഞാത്മയുടെ ഈരോല്ലി വായിച്ചു ശരിക്കും ചിരി വന്നു.:)
ഇനിയാ കുഞ്ഞു നാരങ്ങാ സംഭവം കൂടെ വെക്കം പോരട്ടെ..

ആത്മ said...

എല്ലാരും തിരക്കിലാണ്‌ അല്ലെ സൂ,
ആത്മ ബോറഡിയില്‍ നിന്നും രക്ഷപ്പെടാനും കൂടിയാണ് ബ്ലോഗില്‍ എന്തെങ്കിലും ഒക്കെ എഴുതിക്കൊണ്ടേ ഇരിക്കുന്നത് ട്ടൊ,:)

ഒരു കണക്കിന് തിരക്കുള്ളവരാണ് ഭാഗ്യവാന്മാര്‍.. അധികം ചിന്തിക്കില്ലല്ലൊ,

ആത്മ said...

ചിരിച്ചു എന്നറിഞ്ഞപ്പോള്‍ വളരെ വളരെ സന്തോഷം ആയി!
താമസിയാതെ എഴുതി ചേര്‍ക്കാം..
ഇന്ന് നല്ല തലവേദന, ഉറങ്ങാന്‍ നോക്കട്ടെ,
ഉറങ്ങാന്‍ പറ്റില്ലെങ്കില്‍ എണീറ്റിരുന്ന് ചിലപ്പോള്‍ ഇന്നുതന്നെ എഴുതിപ്പോകും...:)

Diya Kannan said...

athmechi enthoram books aanu vayikkunnathu....oru book finish cheytyha kalam marannu...winter thudangiyappol divasam pettenu theerunnathu pole..samayamilla....

ആത്മ said...

അത്മചേച്ചി പുറകോട്ടല്ലെ ജീവിക്കുന്നത്,
പണ്ട് വായിക്കാന്‍ പറ്റാത്തതുകൊണ്ട് ദൈവം കരുതിക്കാണും, പാവം ഇനിയെങ്കിലും അടങ്ങിയിരുന്ന് വായിക്കട്ടെ എന്നു! :)

രാവിലെ ബിസിയായിപ്പോയി.
രാവണ്‍ സിനിമയും കണ്ടു!
നല്ല ഉഗ്രന്‍ സിനിമ. തമിഴാണു കണ്ടത് ട്ടൊ,
അതും കേട്ടു വിഷമിക്കല്ലേ.. :)
ആത്മചേച്ചിക്ക് വേറേ എന്തെല്ലാം നിരാശകളുണ്ടെന്നറിയാമോ?!
ആകെയുള്ള സന്തോഷം ബ്ലോഗ്, വായന, വല്ലപ്പോഴും ഉള്ള സിനിമ കാണല്‍, പിന്നെ ഷോപ്പിംഗ്, പിന്നെ മക്കളുടെ ലോകവും.

mayflowers said...

സ്റ്റൈലന്‍ എഴുത്ത് കേട്ടോ..
മൈത്രേയി വഴി ഇവിടെയെത്തി.
പിന്നെ,എന്‍റെ ചെറുപ്പത്തില്‍ കേട്ടിരുന്നത് 'ഈരോലി'എന്നായിരുന്നു!! ഇപ്പോഴാണ് അതിന്റെ ശരിയായ പേര് മനസ്സിലാകുന്നത്‌.
ആശംസകള്‍..

Muhammed Shan said...

വായിക്കുന്നു...

Rare Rose said...

ആത്മേച്ചീ.,താളുകള്‍ മറിച്ച് മറിച്ച് കൌമുദിയിലെത്തിയല്ലോ.എന്നും വന്നു നോക്കുന്നൊരാളെ ബ്ലോഗുലകത്തില്‍ കണ്ടപ്പോള്‍ ഒരുപാട് സന്തോഷം തോന്നി..
എന്റെ വകേം മനസ്സു നിറഞ്ഞ അഭിനന്ദനങ്ങളും,ആശംസകളും.:)

കുഞ്ഞൂസ് (Kunjuss) said...

ആത്മാ... അഭിനന്ദനങ്ങള്‍!
ആത്മയെ കേരളകൌമുദിയില്‍ കണ്ടപ്പോള്‍ വളരെ സന്തോഷം തോന്നി. ആത്മയുടെ പോസ്റ്റുകള്‍ അധികം ആരും കാണാതെ പോകുന്നല്ലോ എന്ന സങ്കടത്തിലായിരുന്നു അഗ്രിഗ്രേറ്ററുകളില്‍ ചേര്‍ക്കുന്ന കാര്യം നിര്‍ദേശിച്ചത്.ഇപ്പോള്‍ ആ സങ്കടം മാറി ട്ടോ...

ആത്മ said...

mayflowers,

ആശംസകള്‍ക്ക് വളരെ വളരെ നന്ദി!

ഈരോല്ലി എന്നേ ഞാനും പറയുമായിരുന്നുള്ളൂ,
ഈ പോസ്റ്റ് എഴുതിയപ്പോഴാണ്‌ ഈരുകൊല്ലി എന്നു എഴുതാന്‍ തോന്നിയത്!:)

ബ്ലോഗില്‍ ‘ആടുജീവിത’ത്തിനെ പറ്റി എഴുതിയിരിക്കുന്നത് കണ്ടു.
അടുത്ത പ്രാവശ്യം നാട്ടില്‍ പോകുമ്പോള്‍ വാങ്ങി വായിക്കാം..

ആത്മ said...

Muhammed Shan,

വായിക്കൂ..:)

നല്ല നല്ല കവിതകളൊക്കെ ബ്ലോഗില്‍ കണ്ടു!!
അഭിനന്ദനങ്ങള്‍!

ആത്മ said...

Rare Rose,
അഭിനന്ദനങ്ങള്‍ക്കും ആശംസകള്‍ക്കും വളരെ വളരെ നന്ദി!!

കുഞ്ഞു നാരങ്ങ സംഭവം കൂടി എഴുതി ചേര്‍ത്തിട്ടുണ്ട് ട്ടൊ,
സമയം കിട്ടുമ്പോള്‍ വായിക്കൂ..:)

ആത്മ said...

കുഞ്ഞൂസ്,

അഭിനന്ദനങ്ങള്‍ക്ക് വളരെ വളരെ നന്ദി!! :)

വല്യമ്മായി said...

Congrats

ആത്മ said...

നന്ദി വലിയമ്മായി!:)

വീണ്ടും പനി പിടിച്ചു.
മരുന്ന് കഴിക്കുന്നുണ്ട്..

ബ്ലോഗ് കലാകൌമുദിയില്‍ ഇട്ടതിനും അതിനെപ്പറ്റി എഴുതിയതിനും ഒക്കെ ഒരു നന്ദി രേഖപ്പെടുത്തണം എന്നൊക്കെ കരുതി ഇരുന്നതാണ്‌.. ഇന്നു പറ്റുമെന്നു തോന്നുന്നില്ല.

Diya Kannan said...

athmechi.....

congraaaattttttzzzzzzzzzz!!!!!!!!!!!!!!

ആത്മ said...

thank you my dear!!!...:)

chithrangada said...

ആത്മ,മൈത്രേയി വഴിക്കാണ് ഇവിടെ എത്തിയത്.കണ്ടതില് വളരെ സന്തോഷം!ആശപൂര്നദേവിയുടെ ബുക്ക് ഞാനിപ്പോള് അടുത്ത് വായിച്ചതേയുള്ളൂ.
വളരെ നന്നായി തോന്നി.ആത്മയുടെ എഴുത്തില് selfpity കാണുന്നുണ്ട്.ഇത്ര നന്നായി
ആത്മപ്രകാശനം ചെയ്യാന് കഴിവുള്ള ആള്ക് അതിന്റെ ആവശ്യമുണ്ടോ ?

ആത്മ said...

chithrangada യെ കണ്ടതില്‍ എനിക്കും വലിയ സന്തോഷം ഉണ്ട്!

സെല്‍ഫ് പിറ്റി യെ പറ്റി എഴുതിയത് എന്തെഴുതണമെന്നറിയില്ല. ജന്മനാ ഉള്ള ഒരു സ്വഭാവമാണെന്നു തോന്നുന്നു..അതൊ ഇനി സാഹചര്യങ്ങള്‍ സമ്മാനിച്ചതോ!

നന്നായി എഴുതാന്‍ പറ്റുമെന്നൊന്നും ഉള്ള ആത്മവിശ്വാസം ഇനിയും കൈവന്നിട്ടില്ല..

ഓരോ താളുകളില്‍ക്കൂടി എന്റെ ജീവിതം മുന്നോട്ടുപൊയ്ക്കൊണ്ടിരിക്കകൂടിയാണ്‌
അതല്ലെ വലിയ ആശ്വാസം..

എന്‍.ബി.സുരേഷ് said...

ആത്മയ്ക്ക് രസകരമായി എഴുതാൻ കഴിയുന്നുണ്ട്. പക്ഷെ ചെറിയ തമാശകൾക്കിടയിൽ ആശാപൂർണ്ണാദേവിയെ പിടിച്ചിടണ്ടായിരുന്നു.
അമ്മായിയമ്മപ്പോരിന്റെ മൂർത്ത രൂപം നമ്മൾ കാണുന്നത് സുവർണ്ണലതയിലല്ലേ. പെട്ടന്ന് ഞാൻ ആ കാര്യം ഓർത്ത്പോയി. ഒരുപാട് സംഭവങ്ങൾ ഒരു പോസ്റ്റിൽ കയറ്റി വിടണ്ട കേട്ടോ. ഓവർലോഡ് വണ്ടി ആളുകൾ സഹിക്കില്ല. പൊതുവെ ദുർബ്ബലമനസ്കരാ നമ്മുടെ ബ്ലോഗു വായനക്കാർ.

ആത്മ said...

അഭിനന്ദനത്തിനു നന്ദി!
സുവര്‍ണ്ണലതയെ കൂടുതല്‍ കര്‍ശ്ശനമായി നിയന്ത്രിക്കുന്നത് അമ്മായിയെക്കാളും ഭര്‍ത്താവാണ്‌. സുവര്‍ണ്ണലതയുടെ എല്ലാ കൊച്ചു കൊച്ചു ആഗ്രഹങ്ങളും നശിപ്പിച്ചു കളയാന്‍ തക്ക കപട സാമര്‍ത്ഥ്യം ഉള്ള ഒരാള്‍‌. സുവര്‍ണ്ണലത പലപ്രാവശ്യം മരിക്കാന്‍ ശ്രമിക്കുന്നു, വീണ്ടും ജീവിക്കുന്നു.. വീണ്ടും പൊരുതി മുന്നേറാന്‍ ശ്രമിക്കുന്നു.. ഒടുവില്‍ താന്‍ എഴുതിയ
ബുക്കിനെക്കൂടി ചിതയില്‍ വയ്ക്കേണ്ടിവരുമ്പോള്‍ തീരെ തകര്‍ന്ന് ഈ ലോകത്തോട്‌ തോറ്റ് പതിയെ വിടപറയുന്നു..

ഇനി പോസ്റ്റുകള്‍ വേര്‍തിരിച്ചെഴുതാന്‍ ശ്രമിക്കാം.. നേരത്തെ ആലോചിക്കാതെ
അപ്പപ്പോള്‍ തോന്നുന്നത് എഴുതുമ്പോഴാണ്‌ അങ്ങിനെ സംഭവിക്കുന്നത്..

അഭിപ്രായങ്ങള്‍ക്കും നിര്‍ദ്ദേശങ്ങള്‍ക്കും
ഹൃദയം നിറഞ്ഞ നന്ദി!

anju nair said...

aatma.........nalla rachana.....rasichu...